亂皂𥴊仔店 ⓂⒺⒾⓃⓀⒾⓄⓈⓀ

「Tsit-má逐家上欠缺ê就是 你ē當講出一句好ê台語，正確ê台語，若是咱有能力寫一篇文章iah是一句完整ê話，m̄免用詩ê表現來表現ê時陣，我感覺對推展台語較有幫助。」（249 【台語女性書寫】 王薈雯， 6:58） 

von 台灣人台灣事 x 培鈺工作室《台語.生活》電子報第05做伙來讀〈13，15 hia〉

2019 讀無朋友踮面冊分張 ê 台意華文，小面神歹勢 kā 𪜶齪嘈請教 14 ê 我第一个想法是成做北美偝鼠假死無讀著，總是這款駝鳥心態無才調維持一世人，特別是目今 ê 空氣城堡➀大過真實城堡 hōo 每一个 tī 空氣城堡認真做孤鳥 ê 人 mā 無法度好好做隻孤鳥，除非你飛離雺霧豆仔鳥 ê 領地➁。

台語是我自帕水猶未出世就聽著 ê 歌聲，照理來講讀「母湯」這類 ê 台意華文比讀《我是留德華：海獅的德國奇幻旅程》捷出現 ê「Der」夠較好理解伊 ê 14，我卻見讀見捎無寮仔門通入門交朋友抱團𤲍燒 hoo 我想著，這个德文明明就讀有，呔討捎無意思，越頭請教翁，伊講「Google」ê 晝面隨向頭請 Google 引𤆬我出帆並向望伊 ê 致蔭 hōo 我有機會 tī 茫茫網海撈著「台語字典」。自撈著 iTaigi愛台語，我就一路跟綴 iTaigi 愛台語寫台文，紲牽藤到揣台語台語辭典，然後 Es sollte so sein 鉛粉掖有夠額 tī 齊是華文 ê 面冊社團收著國校台語老師 ê 留話「目今 ê 台語行入校園，這是教育部設立 ê 台語辭典 hōo 你罔做參考」就此台文用字 ê 三心兩意，心頭亂操操 m̄ 捌閣相揣。

真心感謝這位交我只有短短這段文字緣份 ê 台語老師，無伊 ê 及時雨，以我細漢煩惱伊 buē 大，大漢煩惱伊未娶 ê 性地，以全台文做部落格主體行 buē 久長，畢竟我足頇顢認人...

一回出門去郵局 tī leh 等青紅燈，見著一台𫝛款 teh 等青紅燈好斡爿 ê 花紫 Bián-juh ê 序大 tuì 我微微仔笑，我倒看正看看無半个人隨驚失人禮 mā 微微仔笑那想這个人是 Tsiâ。請郵局鬥相共 ê 文件處理好勢，tī 街仔路拄著彼台花紫 Bián-juh，我認捌 ê 序大那曝日頭那拭花紫 Bián-juh，簡單拍一下仔招呼，軟晡交翁坐踮磚坪那曝日頭那食下昏飯那破翁仔某大小細粒豆，翁聽著這段笑甲吭跤翹「好里佳哉，你驚失人禮有 kā 厝邊序大微微仔笑轉去。」

自我認捌這位序大，我 kan-ta 知影伊有一台烏色 Bián-juh，遮 ê 人隨个仔隨个生甲 bueh 相𫝛，我唯一有才調認出 Tsiâ 是 Tsiâ kan-ta gún 翁，賰 ê 配件一換隨愛愖足久，伊是佗一間 ê 厝邊，無𪜶認我遐爾仔簡單。

2020 mā 是閱讀分水嶺，我按公視台語台知捌《小王子》有出台文版本隨上博客來落訂到今，我 tuì 台文冊有一種龜怪 ê 雷達像 Die Stachelschweine 刺豬反應➂，我想 bueh 交台文徛相倚卻捷感覺非引底里 ê 我無才調交伊徛相倚，所致我真感謝搪著小王子 ê 彼當時 mā hōo 我搪著李恆德老師《彼年熱天》、王秀蓉老師《我咧唱歌》、藍春瑞老師《奪人 ê 愛》這類又閣愛搬請林美麗老師 ê 文字 kā 我鬥相共做註解「我真平凡，寫作對我來講就是共日常的喜、怒、哀、樂用筆寫出來爾。行佇台文書寫的路，我無像遐的對母語文化有偉大使命感的人按呢懷抱著大志氣，顛倒是『小鼻子，小眼睛』干焦會曉用查某人的視角看世情，用家庭主婦的喙舌啖生活中的鹹甜，用女（母）性視野來書寫性命中的沓沓滴滴。」➃

我 ê 文學閱讀之路引述《啼印》作者翁月鳳 tī 自我介紹所寫 ê「一个冊讀無懸，愛做夢的阿媽」來記錄我 ê 台文冊刺豬反應，我愛讀台文，台文市場卻敢若較要意詩 ê 創作交文章愛寫甲若華文氣口 ê 散文抑是小說，這个喙斗是 tuì「詩人」ê 浪漫追求抑是伊是引底里 ê 證明，我無一个認捌，總是自接觸台文我 mā 按出名人推薦沓沓仔揣著東海佮北海 ê 無相𫝛來決定閱讀投資。

我清楚知影我 ê 東海北海分類 buē tuì 這个產業起啥物海湧，不過我 ê 台文閱讀之路 ē 愈行愈狹，像「換日線」作者番仔火所寫 ê 這段話「同中求異的「減法思維」，終將限縮自己格局」特別是目今 ê 台文市場無國藝會抑是文化部語言友善環境及創作應用補助，bueh tī 台灣上好揣冊 ê 網站博客來揣著台文冊是一件比撈金魚閣較硬篤 ê 工課。

不過，這个雙生仔求無仝面 ê 減法閱讀 tī 今年有淡薄仔反變，tī 《台語現代散文選》讀著一位 hōo 我認定順伊 ê 箍仔開拆伊 ê 作品，智識無夠額 ê 我絕對讀無半項就莫自作多情 kā 伊交觀 ê 作者，這斗順台語現代散文選翻頭讀𫝛款捌出現 tī《台語現代小說選》 我雄雄想著作者陳雷 alias 吳景裕醫師分張 ê 故事，內容大約是順家己 ê 年閣記錄屬於這个年閣 ê 故事，這位見見面隨斡頭 ê 作者 hōo 我想著吳景裕醫師分張 ê 智慧，隨翻頭請聚珍臺灣 kā 我鬥借冊到德國。

Arthur Schopenhauer 講 Bueh 讀出好 ê 代誌，一个條件就是莫讀出歹 ê 代誌➄，《我聽著花開的聲》作者 Achiak 交國中校長對話 ê 故事 hōo 我想著 Schopenhauer mā 想著家己 ê 青光眼，現世甲。

我 tuì 台文出版市場無一个認捌，總是我 mā 無興 uī-tio̍h 支持就烏白相伨，起因我真心認同頭段 ê 分段 若是咱有能力寫一篇文章iah是一句完整ê話，m̄免用詩ê表現來表現ê時陣，我感覺對推展台語較有幫助，我徛 ê 角勢四箍圍仔是田，無啥大冊店，所致我 tuì 德國出版市場面肉無一个理解，總是按車頭 ê Relay 抑是超市設點 ê 冊櫃來看德國文學，我 ē 講「詩」敢若是三疊紀 ê 作品，這幾冬按無料分張冊櫥紮轉來 ê 冊 mā kan-ta Liebesgedichte 愛情詩這本猶未 kā 伊送轉去結緣 ê 冊。所致當我 tī 聚珍臺灣𫝻著這本冊我開始巡網路，畢竟我無想 bueh 閣一斗 kā 逗點囥 m̄ 著位，像早前聽彰化縣前縣長周清玉縣長所分張 ê「台語文創意園區」是台語文，創意，園區 m̄ 是台語，文創意，園區，像啼印 ê 台語文集，我按呢做逗點「台語文」，「集」ê 認為〈記持的剪綹仔〉tsuē 過〈啼印〉，tī 遮我 mā 愛說明我 tuì 啼印這本冊無任何 ê khiau-khi，起因我清楚知影是我家己無斟酌繩網路冊店分張 ê 內容隨自我掠定伊就是一本散文 tsuē 過詩 ê 「台語文集」。

一本冊按臺灣郵局寄到德國，好字運無 hōo 海關抾稅 ê 運費捷捷聽好 hōo 我 bué 一本德文原文冊，抾稅會使得閣加 bué 一本抑是兩本 ê 掠外價數 hōo 我認真繩聚珍臺灣，前衛出版社，博客來遮有才調揣著 ê 網路資料，確定伊實實櫼櫼是台語散文 tshan-tshiūnn 劉靜娟老師 ê《台語日常》m̄ 是一篇華文透幾句台語 ê「台語日常」抑是「以詩表現 ê 台文」。

我頇顢寫讀書心得 mā 無彼个才調寫冊評，總是每一个人有伊家己 ê 讀書印象，像劉靜娟老師《驚驚袂著等》ê〈買你保險的人攏真衰〉hōo 我想著家己 ê 同學 mā hōo 我這款感覺，就順這个感受 uī 這卷冊做一段交伊無啥底代 ê 台文文學心情練跤花。

《我聽著花開的聲》寫著作者 tī 私立高職教冊 ê 記持 hōo 我想著交校長有𫝛款態度 mā tī 高職教冊 ê 親情， 伊 ê 學生 mā 有德英練跤花「洪雅書房」余國信先生 ê 訪問「啥物科系交啥物語言表示你是啥物款 ê 階層。」

我家己 mā 是高職出身，𤆬 gún 3 冬 ê 高職老師交 gún 表姊佮校長是相𫝛 ê 態度講我未來抾捔，總是我 ê 未來交作者 Achiak 這段話 bueh 相仝若 beh 講今仔日我有啥物成就，是我有家己 1 路行來的身世、經驗，有對性命、土地的關懷佮堅持。M̄ 是因為我的學識、財富 ah 是社會地位。按呢咱 tsiah 真正會當了解，咱會當是快樂的做穡人、愛心看顧病人的醫生佮護理師、熱心載客服務的 ùn-tsiàng、予逐家歡喜笑微微的店員....，咱會當是人看無目地的菅芒花、是生佇山崁的台灣百合、市場熱情 huah 價的紅玫瑰....家己開家己媠，圓滿自在，展現多采多姿的性命光彩。有內涵的性命上媠，佇安安靜靜的中晝，我聽著花開的聲....

「想 buē 到你 ê 外語有兩步七」一回轉去臺灣，因為翁婿是德國人 hōo 伊請去 tuì 伊 ê 學生小小演講按怎按高職生出脫，伊按呢 kā 我褒嗦，心內無四序，總是 mā 無興紲喙，畢竟事實就是按呢生，免了喙瀾。

「人上大的悲哀是經過別人授權，tsiah 肯定家己存在的價值」作者分張 tī 同名同篇〈我聽著花開的聲〉ê 這段我 mā 捌經過，總是阿母 m̄ 捌字 ê 樂觀深深釘 tī 我 ê 心「歹勢啦，我就青盲牛一隻」搪著目頭懸，看人 buē 上目 ê 人，阿母總是笑笑仔按呢 kā 別人 ê 問題包包擲去焚化爐燒掉。這久 ê 我搪著相𫝛 ê 問題 mā 是按呢處理。

「恁老母唯一贏過我 ê 事項，伊 ê 母語講甲比我較老，起因目前 ê 我 kan-ta 會曉通用德語」gún翁𪜶老母是一位看家己母語 buē 上目 mā 教𪜶後生交查某囝按呢輕視祖先 ê 語言，不過一搪著新婦我伊隨 kā 剪掉 ê 舌接轉來，知影伊 ê 斤兩 ê 新婦 mā 跟綴 m̄ 捌字 ê 阿母 kā 伊 ê 態度包包擲焚化爐燒掉。其他類似 ê 四常 mā 順這个步數處理。

2025 閱讀《我聽著花開的聲》順花開 ê 聲行轉去 2022 tī 自由時報看著 ê 報導交德英心情練跤花，想著翁貼心提醒 ê「電子冊會使得儉運費」，我 ê 回答 mā 交洪雅書房余國信先生相𫝛，遮我以我家己 ê 語法做記錄「冊會使得一反閣反，反甲爛，準做電子冊 mā 有相𫝛 ê 功能，我就是踅 buē 出手頭空空這个磅空。」

我 m̄ 知影目今 ê 人按怎看待接受教育交一本冊 ê 影響，總是我清楚知影無先人 ê 綿豉，我猶活 tī 查某人做青盲牛是福氣 mā 是美德 ê 世界。 

➅踅自由時報讀著國民戲劇該講台語或華語？ 吳念真「浮潛」給答案，小英也有話說引𤆬我思考家己 m̄ 捌愖過 ê 語辭，隨上網請教眾𠢕人，𠢕人 hōo 我這个答案浮水沬phû-tsuí-bī、淺沬tshián-bī、浮沬phû-bī 隨想著《我聽著花開的聲》〈藍色紅頭嶼〉篇 mā 有這段話：

東北角的雙獅岩，是海底火山活動佮久年的海蝕、風化，形成的景觀。看起來親像 2 隻獅仔覆佇遐相對 siòng。外海的軍艦岩，一粒無人的小島，聽講生做 siunn 過頭 sîng 軍艦，二次世界大戰的時，bat 予美軍轟炸。遐海底生態豐富，是浮水沬欣賞草丑仔魚的好所在。

民宿主人阿強，tshuā 阮去海水、淡水交會的野銀冷泉耍水、浮泅，幼幼的白沙仔，水質清清，各種色水的魚仔看現現，雖然生張無仝，仝款自在泅來泅去，媠 kah，海底是另外 1 个世界。

一個浮潛 Snorkeling, Schnorcheln tī 台語有 5 種講法，這 5 種包括我個人順文章發音 ê「浮潛phû-tshián」，感謝這篇文章 hōo 我無機會顧秧，較贏顧倉。

順〈藍色紅頭嶼〉草丑仔魚我想著 RTI 中央廣播電台「hái！佇遮啦」Let’s 《Finding Dory》！mā 談著 Nemo 華語 ê 小丑魚佮 Dory 華語 ê 擬刺尾鯛 ê 台語按怎講 hōo 我又閣成做貓一隻想 bueh 知影按怎以台文 kā 𪜶做記錄。

小丑魚：草丑仔魚、三跤娘仔、三角娘仔

擬刺尾鯛：藍倒吊、剝皮魚

世界沓沓仔消失 ê 語言 tui 我來講 tshan-tshiūnn《跳舞的熊》形容德國人按怎 kā 環境舞甲無一隻熊，然後 kā 向望寄踮保加利亞仝款 mā 宛然德文老師分張自羅馬年閣就存在 ê 活泉行過千外冬從來 m̄ 捌焦洘，因為人類 m̄ 照天理行，天自然無 bueh 照甲子 hōo 本底若加拿大 Niagara 水沖 ê 水泉無半滴水，目今 ê 人想空想縫想 bueh 恢復猶是無半撇 ê 故事 mā 想著行踏土呂其 Pamukkale 棉堡長長若溜 ê 水管恬靜吐水補空 ê 畫面。

每一个人有家己 tuì 世界 ê 定義，所致記錄這段文字 m̄ 是 bueh 挑戰文章內容，不過我 ê 起心生念就愛滅心了念抑無我 ē 著蛆。

➀ Luftschloss 空思夢想、譀想、無米有舂臼，無囝抱新婦

➁ Wolkenkuckucksheim 空思夢想、譀想、無米有舂臼，無囝抱新婦

➂ Arthur Schopenhauer 分張 ê 主角是刺豬，目今逐家認捌 ê Hedgehog's dilemma 針蝟(tsiàm-uī)困境是按法文 dilemme du hérisson 來。

➃ 〈佇不幸當中揣幸運〉von 林美麗《石頭縫的幸運草》

➄ Um das Gute zu lesen, ist eine Bedingung, dass man Schlechte nicht lese.

➅ 2025.05.03 新添文字

Ich glaube, dass das Schicksal ein weiteres Schicksal bringen wird.

Nach dem Lesen der Zeitung aus Taiwan, ich welchsel zur E-Newsletter.

Es gibt ein Video-Interview, das mein Herz berührt.

Ein unabhängiger Buchhändler antwortet einem Interviewer, warum er nlieber physische Bücher als E-Books lese.

" Weil ich Anmerkungen dazu machen kann. "

Vor zwei Jahren habe ich darüber nachgedacht, ob ich E-Books lesen soll.

Da das Buch von Taiwan nach Deutschland verschickt wird und die Versandkosten zum Tarif hinzukommen, kann ich mehrere Bücher nachkaufen.

Nachdem ich eine Weile gekämpft hatte, entschied ich mich dennoch, das physische Buch zu kaufen.

" Weil ich Anmerkungen dazu machen kann. "

Und, natürlich, ich bin sehr Eitel.

Ich liebe eine Bücherwand.

Genauso wie jetzt beim Zeitunglesen und beim Kaffeetrinken.

「Oh, mann... mein Leben ist so Europäisch」

「Du lebst in Europa」sagt mein Mann.

I believe that fate will bring another fate.

After reading the newspaper from Taiwan, I switched to the e-newsletter.

There is a video interview that touches my heart.

An independent bookseller tells an interviewer why he prefers reading physical books more than e-books.

"Because I can annotate it."

Two years ago I thought about reading e-books.

The reason, the book is sent from Taiwan to Germany. The tariff and air freight I paid can let me buy other books.

After struggling for a while, I still decided to buy the physical book.

"Because I can annotate it."

And, of course, I'm very vanity.

I love a wall of books.

Just like now when reading the newspaper and drinking coffee.

「Oh dear... my life is so European」

「You live in Europe」 says my husband.