亂皂𥴊仔店 ⓂⒺⒾⓃⓀⒾⓄⓈⓀ

德國電視台 Der Tricks 抑是 Marktcheck  有一集討論 teh 討論德國若 teh 坐飛天車 ê 物價，比如講這禮拜雞襟胸 1 公斤 7.99€，下禮拜 1 公斤 12.99€，然後廠商講遮 ê 價數是一月日 ê 固定價數 hōo gún 翁開始傳世佛經，世世(踅踅)唸「你款物愛斟酌繩前後禮拜。」

巴禮講道，家己攏著，我無興跟綴伊起情緒蛟龍來一个「信這，死了無了拜」就 kā 廚房款 ê 物逐條仔逐條算 hōo 伊參考；串仔罐頭烏露戰爭進前是 0.99€，特價 0.79€，烏露戰爭按 1.29€ 漲懸價到 1.69€，現此時停跤 tī 1.49€，特價 0.99€ ~ 1.19€，串仔罐頭莫 kā 烏露戰爭帶來 ê 運輸算在內，現此時 ê 串仔愈來愈少，起價是合理，總是起甲 1.69€，這交臺灣飼牛業相𫝛按𪜶遐出來是 30 箍台票，行到超市超過 100 箍，這中間 ê 70 外箍，運輸、通路敢有遮爾仔框金，以運輸 15%，通路 15% 來算，猶是無到 70 外箍 ê 消費者價值，總是這个消費者價值就 tshan-tshiūnn 恁認為 ê 俗價，我認為 ê 無價值仝款隨人認定，總是食物這件代，我無遐爾仔無頭腦，畢竟錢四跤我 tsiah 兩跤。我 mā 無總舖師幻想，掠做廚房有厚甲若蠓 ê 家私就𠢕出菜。

串仔算了換雞襟胸，雞襟胸算了無興閣算 hōo 伊捌，「我是活 tī 現實世界 ê 人 m̄ 是活 tī 乞食攑蠓捽，假仙假觸，盤仔假赤鯮。」

本底掠做家己正港是過橋較 tsuē 牽手行路，食鹽較 tsuē 牽食米 ê 伊，鼻仔摸摸挲挲莫閣指正牽手捌算 m̄ 捌除，糶米糴番薯。  

 講著德國進口米，我 ê 茶鈷呻甲伊 mā 喝厭𤺪 buaih 閣出聲。

講著德國魚臊鞏金閣框金，m̄ 管我按怎下性命骨力手面趁食猶是骨頭含梢 buē 鞏紅毛塗。

講著牛肉、火雞肉、下水(hā-suí)、Tshì-sù、牛奶、優格遮 ê 交咱臺灣相比並是少缺閣大碗閣滿墘 ê 食物，我是喙白家己做得來。

講著𠕇果、種子抑是菜子，我愛食𪜶總是驚大箍 mā 驚惶 kā Omega-3 食甲變 Omega-6 hōo 家己發炎，所致一日加加食 10g。

Uī-tio̍h 免系疫統守門員鋅講甲規一大拖沙我 mā 蓋𠢕，總是這 mā 表示我認真面對家己 ê 喙白並學習喙白帶來 ê 缺欠愛按怎 uī 家己敆藥 hōo 家己 ê 日子過甲較四序並快活。

通貨膨脹 hōo 錢愈變愈薄愈來愈細圓想 bueh 綿豉實踐 ê 意志，像莫近廟欺神支持過鹹水 ê 俗物 m̄ 是人性考驗，是褲袋仔袋磅子按怎好好生存 ê 問題。

自烏露戰爭開始，本底猶未感覺疼 ê 食食四常，因為漲懸價 hōo 我開始想 bueh 暗時食西瓜，半暝仔反症，退悔綿豉 buaih 支持過鹹水。 總是遮 ê 農業猶原 tsiâu-tsn̂g，工業 mā 無拋荒，所致莫喙白甲像 gún 翁按呢，無著時 ê 物綿精無伊就 buē 活 ê 因為戰爭帶來 ê 通貨膨漲錢變細圓 tuì 我來講猶未疼甲若針 teh 揻，像翁 ê 朋友綿豉 Kam-má-tooh 就愛食鮮沢 buē 使得食罐頭，當 Kam-má-tooh 按一公斤 0.99€ 漲甲 3.49€ 就 m̄ 通哭呻政府無管控物價 hōo 伊 ê 財庫愈來愈空。畢竟伊 ê 俗物 buē bué 破家是別人離鄉以低甲連當地人都無法度接受 ê 月給交山林一日 24 點鐘，一冬 365 工無暝無日付出才有 ê 甜蜜。

「西班牙有一搭自羅馬時代就存在 ê 山泉，自人類 kā 無著時轉做一年迵年齊著時 ê 食食文化，這港晟養萬生萬物 ê 山泉焦到若沙漠，擠無一滴水」年過 70 感恩一粒米，百粒汗交維持食著時食物 ê 德語老師 tsuē 冬前 ê 分張到今猶原記牢牢，起因我 mā 相𫝛。

Gún-ê 食著時物無限在地，畢竟目今 m̄ 是向時萬物唯獨本土著時 ê 年代。德國寒人無藍莓、無番薑仔、無敏豆、䆀豆通種作，南美洲 ê 秘魯交智利拄好大出，gún 就順這个時代 ê 利便接續享受這滿滿 ê 青花素，非洲北爿 ê 摩洛哥水土猶原適合栽作番薑仔、敏豆、䆀豆 gún 就順遮 ê 利便補德國寒人僫得 ê 維生素佮礦物。綿豉 ê 理想是維護環境 mā 四序家己 m̄ 是 kā 家己舞甲掂篤僫過日，敢 m̄ 是？

歐洲 ê 意大利、葡萄牙、法國、西班牙齊有種米，遮 ê 國家所栽種 ê 米交咱番薯島台灣無相𫝛，總是猶是揣有交脾土相敆 ê 米種，特別是意大利佮葡萄牙。我 tuì 意大利食食文化無研究，總是我印象中有地選擇 ê 意大利米種交咱番薯島相𫝛 tsuē 甲若河溪，價數閣親切可愛。

德國這幾冬食米人口增加，總是𪜶 ê 市場以我個人 ê 觀察猶原保持印度米交泰國米兩類，這个綿豉 ê 固定 m̄ 知是市場做決定抑是進口商做決定。所致準做糙米有我需求 ê 鋅，我 mā 罕得 bué，畢竟印度米交泰國米正港無敆我喙就莫杜猴損五穀，我 mā 貧惰 uī-tio̍h 一包敆家己喙斗 ê 米專工盤兩到三幫車到市區 ê 中國超市款米轉來補喙空。所致生活無法度照家己 ê 四序來行，家己就愛揣四序，像目前生活 tī 愛食肉無愛食海產 ê 德國，罕得食鋅夠額 ê 牛肉就換食雞心豆、燕麥片、優格、腰果、蘑菇、菠薐仔、䆀豆等等來補家己喙白交避免褲袋仔袋磅子帶來 ê 困擾。

囡仔時讀天增歲月人增壽，春滿乾坤福滿門認為伊是自然，這久讀這對聯是自我安慰劑。無 tsiâu-tsn̂g ê 營養交規律 ê 生活慣勢向望家己有機會跟綴天添歲數，我較早睏較有眠。

我 tuì 北非小米一直有興趣，總是一想著伊愛炊我就𤺪。炊這个動作 tuì 我來講就是厚工 ê 代表辭。像炊粿愛浸秫米、挨米、菜頭礤簽、抐米漿...一想著遮 ê 工課我隨放棄，準做逐家齊講好味素。

W wodzie, owej płynnej materii, nie ma nic stałego 

當一陣人討論這愛按怎寫，彼愛按怎講 tsiah 著，我已經揣著德語號做 Hirse 英語號做 Millet 華語揣著 ê 資料 kā 伊號做雜穀 ê 澎祖。

寫這段臭酸話無任何特別 ê 意思，只有拄拄好想著遮 ê 綿精請教「你為什麼要說臺語」、「你 ê 意思是恁阿爸是 ē 曉講臺語 ê 外省仔？」𤆬 hōo 我 ê「阿嬤你怎麼沒感覺」。

遮 ê 話 tuì 目今 ê 我正經是無感覺，起因我清楚知機，我講 ê 話是咱人族其中一个語言，無啥特別。若 bueh 講伊有啥物特別，我 kan-ta ē 按呢講，世間萬物無一个固定，唯一 ê 固定只有咱人類慣勢 ê 西瓜倚大爿掠做猴穿衫 ē 變做人 ê 陷眠。

語言問題交 hōo 專業學者交軍隊接觸盤撋，平民老百姓 ê 我只要享受學者承 Martin Luther 生湠 ê 智慧，符號無屬任何族群，像拉丁語 ê Mare 轉化做 Meer，羅馬按一个拆做東西羅馬閣拆做一个 hōo Voltaire 伏爾泰講伊是一屑仔都無神聖，閣 m̄ 是羅馬、更加 m̄ 是帝國 ê 神聖羅馬帝國，跟綴 Napoléon Bonaparte 拿破崙行入歷史，遮 ê 過程千枝萬葉 mā 有紲壇較省紅包禮 ê 新面肉。

像 Engagements 一字，德語、法語、英語講法齊無相𫝛，準做 m̄ 捌葡萄牙語，認捌 Engagements mā 有才調看出 Engajamentos 大約仔 ê 意思，𫝛款 ê 意思，臺灣華/台/客語寫保證，日文寫保証，中國普通話寫保证，四个語言無仝講法。

檢采是天氣 ê 關係，致到近來 ê 心情捷捷起雺霧，捷捷落鬱雨， 罕得摸日鬚。

我無鬱症 mā 無烏白亂想，不過他鄉變家鄉，家鄉變故鄉，我總算理解一開放中國探親芋仔爸隨起手安排返鄉 ê 心情，交第六間伯伯總做身體已經無蓋好 mā bueh 泅轉去故里 ê 心情。

交翁來往，m̄ 捌剪 gún 姊妹 ê 舌，台語 mā 講甲比我輾轉 ê 芋仔爸交人生總有不可節 ê 狀況 hōo 兩位阿姊 mā 相紲轉去塗州賣鴨卵 hōo 伊 tuì 𪜶三人無印象，總是我清楚知機，當我談著「我 ê 阿姊𪜶若猶 tī-leh，搪著遮 ê 代誌𪜶 ē 按呢做，按呢生，𪜶 ē kā 我 ê Line 添甲滇滇 hōo 我起痟...」我 ê 心有一个烏空，烏甲 hōo 我無法度妝娗，gún 這个家賰我一个人。

我思念臺灣，逐年過年 mā 有朋友寫 Line 問「今年敢有按算轉來臺灣過年？」我 tuì 轉去臺灣這件代誌猶是無按算，起因臺灣已經無一人 ē uī-tio̍h 我一通電話，坐踮亭仔跤等我硞 leh 硞 leh 按大路踅入巷仔，猶未見著人隨問「腹肚 ē 枵仔 buē，我有攢滷肉，ē-tàng 隨食」，抑是「你當時歇睏，敢 bueh 轉來？」一確定時間轉到厝，厝內隨一盤炒甲芳芳芳 ê 蒜頭蝦。

In Vino veritas, Im Karton Anregung.

酒內有真相，厝邊 ê Hellofresh 有靈感。

Gún 3 樓 ê 厝邊是一位 Z 世代緣投少年兄，自伊三冬前交 gún 成做厝邊，伊 ê Hellofresh 箱子就成做見箱知人 Hamlet 哈姆雷特 ê 你看 buē 著伊，我看 ē 著伊。

綴 buē 著時代 ê 我 mā 因為厝邊 ê Hamlet 新智識。原來如貓，掠做若雜菜麵 ê 外送平台 mā 敆無料食譜網站 hőng 參考。 

近來，早前無啥大問題 ê 肩胛疼，開始 tshan-tshiūnn 一尾三文魚搢水一路按肩胛骨泅到頭殼碗 hōo 我坐 mā m̄ 是倒 mā m̄ 是，不過，這个無爽快是我家己 kā 招 m̄ 是伊硬 bueh 佮我交葛(kau-kuah)。

Tī 手目無因無端幌韆鞦 teh 搐，我知影這是身體 tuì 我 ê 點揬「你 mőo 繼續蠻皮落去，規日交電腦黏黐黐」，總是我 tuì 身體 ê 關心是雜唸大家出蠻皮新婦 ê 我交電腦曷無一日貼貼像 gún 翁按呢。伊大丈夫我愈無代誌。

這個鐵齒銅牙槽硬 bueh 佮德國人耍牛頓草(gû-tùn-tsháu) ê 輸贏，當然 mā 是我輸甲忝忝 ê 斟一杯茶攏哀爸叫母。這个紅龜生蟲，龜怪 ê 歹癖 hōo 我想著因為畏羞禮(uì-siáu-lé)兼驚得失人 m̄ 敢 tuì 朋友講我 bueh 交你另家各食(līng-ke-koh-tsiah) hōo 家己 mā 致著這个症頭 ê 過了代。

一想著家己不三時 tuì 踅螺仔門踅金龜磨，我就感覺匪類討債，特別是阿母轉去塗州我智覺著時間 m̄ 是用飛--ê，是直接無去 ê 目蚶猶 teh 交今仔日 ê 金烏盤撋，隔工 ê 日鬚已經來問 bueh tsham 伊交結無？

我是詹美樹 ê 翁婿

Gún 媠某講 gún 今仔日愛成做 一隻牛，我 kā 伊講，gún 德國人無 teh 做羊抑是牛，不而過我知影這是掠猴入山，加講--ê。

所致，我這个 kan-ta ē 曉出一支喙 ê 人就 m̄ 通乞食攑蠓捽仔，buē 博 buē 博閣兼做䆀猴 hōo 家己隱痀拋捙輪，食力閣歹看。

便當紮來辦公室開始食晝，我 tsiah 拄微波，同事一个一个行倚來鼻芳兼喙瀾㴙㴙滴。

 當我想 bueh 開喙回應𪜶 ê 褒嗦目尾䀐著阿湯 ê 飯包，一粒林檎，二塊 kan-ta 𩛩 Há-muh 佮 Tshì-sù ê sa̋n-tóo-it-tsih，gún 小妹彼日 tuì 我講 ê 話隨浮在眼前「你頂世人燒著好香 m̄ 免接手阿爸 ê 四常」，我隨 kā 話敆便當幸福食落腹 mā 順同事 ê 欣羨交𪜶做陣褒嗦我 ê 好字運交幸福。

《貓有九條命，我有好生活》 德國受爭議 ê 導演 Leni Riefenstahl tī 回憶錄按呢紹介家己。

這久 ê 我 mā teh 愖有一日愛紹介家己 ê 往過，我 ē 按怎按怎紹介家己？

一愖這件代誌心神就若一隻狗遮挖一空、遐挖一窟，結果敢若 teh 做議量，不過有一件代誌已經確定落來就是我 mā bueh 按呢寫，貓有九條命，我有好生活。

這个好生活無表示咱世俗認定 ê 食好穿好，這个好生活是你這世人面對快樂災厄 ê 態度。

新正期間朋友冇談網路世代帶 hōo 伊 ê 壓力。

 咱現此時認定 ê 高貴是向時 ê 卑賤(Pī-tsiān)，像兔仔耳➀(Hasenöhrchen, Lamb's lettuce, Mâches)，蠶豆、馬齒豆、豬豆➁，目今是 Holloween 萬聖節重要主角金瓜 tī 往過是豬菜 mā 是散赤人上主要 ê 糜飯。食物交語言𫝛款，流擺行跤到臭頭仔 mā-ē 做皇帝。

自按栽 tī 海洋 ê 番薯島徙岫到四箍圍仔 kan-ta 若狗蟻鬚有海洋 ê 德國，有機會食著魚臊是手指頭交跤指頭合做伙算猶有賰。我食紅肉 ê 機會是地球順日頭公遨(gô) ê 百外倍。

人猶 tī 番薯島 m̄ 捌啥物號做來洗症候群 mā 罕得交感冒做朋友 ê 我，自徙岫到德國除了一年膨風 15 公斤掠外，來洗症候群交感冒 mā 捷來挨拶 hōo 我掠做換年(Wechseljahre)開始進行，驚甲半小死。畢竟，我徛這个年歲(45~55)猶有一寡時間。

按臺灣徙岫到德國 ê 身體變化 tī 我猶未掠著筋進前，我認定𠢕感冒是臺灣交德國 ê 天氣無相仝，來洗症候群凡勢是烏貓姊年間愛食冰 ê 慢分復仇。遮 ê 現象一直到人減重成功，年歲 mā 正式踏入換年週期，我 tsiah 開始繩問題。因為罕得落頭鬃 ê 我 m̄ 管捊頭鬃抑是洗頭鬃，齊是一大搣髮菜 hōo 我驚甲無半條命，隨請教 Google 眾大細廟頭皮問題按怎來交愛按怎處理。

1. 基因問題 - 無。

整理文章，讀著這篇想著豬頭皮朱約信 tī 阿愷之聲 EP122 三十鵝麗分張楊逵前輩 hőng 改作品 ê 態度，我想著人 tī Rostock ê 了時間佮無聲無說 ê 據人決定 ê 過了代。

下跤 ê 文字是早前寫 ê 心情，想 bueh 刣掉感覺無彩就換一个角度跟綴顧德莎女仕 ê 跤步 --- 面冊是窗仔，每工佇頂懸貼詩，有人看有，有人看無。不管看有看無，寫了，就無心事。

遐 ê 過了代，寫了，確實無心事。

按挪威轉來到瑞典，踅台文里長伯鄭順聰先生 ê 面冊增加冊單智識，讀著面冊無一目𥍉就 kā 文章刣掉 ê 問題，我想著近來收著 ê《台語。生活》第十五期電子報「面冊 ê 用法」 Hena ma 談著觸及率 hőng 閘水，鄭順聰先生分張兩位台文系教授 ê 文章 hőng 無聲無說秒殺，讀遮 ê 文章我想著面冊想 bueh 利用 What's APP 威脅歐盟，押尾緊仿荷蘭囡仔 kā 手指頭仔楔入水庫破空猶是無較縒 ê 事件。

我無理解臺灣人是按怎遮爾仔依賴面冊 mā 無想 bueh 研究更加無興討論這个問題，起因我 ê 態度 mā tshan-tshiūnn【台灣新眼界】20240724 臺灣閩南語VS.臺灣台語共通語言欲消失！台語愛正名！復振愛有方法？主持人黃鵬仁 ê 這段話「管待伊有水準無水準，我就是講這个話 ê 人」，面冊當初威脅歐盟公民無加入面冊無通繼續使用 What's APP，歐盟人民無 tshan-tshiūnn 按鄭順先生遐看來 ê 呼籲文，歐盟公民 kan-ta 直接回應面冊 ê 問題 --- 我敢有需要面冊你這个問題。

第一擺食黎巴嫩餐廳是人 tī Berlin 見著一群歐洲人出出入入隨成做貓徛踮店門按內底貓貓仔相，店東隨行倚來笑微微講「來坐」。

我 tuì 中東文化無一个認捌又閣捷捷 kā 橐袋仔麭𩛩肉遮 ê 料理直接認定是土耳其料理，所致 mā 綴 leh 文文仔笑兼幌頭表示「多謝」。

按呢互相客氣來客氣去，店東踅轉去招呼人客，我越頭揣人猶原 Unterwegs ê 男朋友，這久 ê 翁，敢有發見女朋友 hőng 拐去。

「這是黎巴嫩餐廳，你敢無興趣？」知影 m̄ 捌字兼 m̄ 捌一个呼 ê 女朋友 tuì Phoenicia(腓尼基)文化有莫名其妙 ê 興趣，總算搪著一間按這角勢來 ê 人呔無喝講「我 bueh 來體驗一下。」

我手指內底 ê 水煙妝娗佮橐袋仔麭𩛩肉，翁知影我 ê 14 隨講「希臘 mā 有 Kebab。」

M̄ 知是翁 ê 爸母真𠢕掩崁、妝娗病灶抑是𪜶兜正經有混世魔王宣傳 ê 基因 buē 破病，sóo-tí hōo 伊 m̄ 驚致著糖尿病、高血壓、白內障(pe̍h-lāi-tsiàng)遮 ê 大多數是日常慣勢造成 ê 問題。

Anhalten！別人兜 ê 作文寫到遮為止，我唯一 ē-tàng 做 ê 代誌就是清楚 hōo 伊知影，我 m̄ 是娶伊來顧，顧伊認為 ê 食老仔就是愛有遮 ê 病疼，而且遮 ê 問題無啥了不起。

「你若是一直按呢認為遐無要緊，我 tsiah buē 沐著打馬膠(Pech gehabt/歹運)，你永遠 buē 珍惜你自本比別人較健康 ê 身體，不過你 ē-tàng 選擇繼續匪類甲連仙丹攏無法度改變 tsiah 來後悔是按怎我遐爾仔無照顧我家己，我這久 ê 任務 kan-ta 想 bueh kā 健康揣轉來」我 kā 一位致著 SLE ê 德國姑娘佮一位無珍惜家己骨本 ê 上卌 buē 攝太太，做陣接受德國醫療節目訪問 ê 回答鬥做一句勸世句 hōo 伊參考，伊 tsiah 開始改變，不過我相信我 ê 恐喝大過𪜶家己 ê 實例 --- 你莫向望細空 m̄ 補，大空叫苦，我 ē 順甲若新婦仔照顧你。

頂站仔出門拄著德國新聞事件 hōo 伊 ê 近視兼烏仁目鏡拍 m̄ 見，伊開始揣新目鏡押尾發見 bueh 照臺灣 ê 價數 tī 德國配一隻一模一樣 ê 近視兼烏仁目鏡，較早睏較有眠。

「掠日我 mā bueh 來 bué 一支烏仁目鏡。」

Tī Google 猶末通知我 ê 資料庫 ē 按亞洲中心徙到歐洲中心 ê Ireland tī 華文推薦讀著一篇真有意思 ê 文章 - 你 tī Starbucks 手機仔隨出現 Starbucks 相關 ê 臆你佮意是 m̄ 是 Google teh kā 你監視？

我 tuì 電子科技無一个認捌 mā m̄ 捌愖過這个問題，讀煞這篇文章我又閣成做貓開始斟酌看家己 ê 手機。

拄按臺灣徙來德國 ê 手機是彼款揤 Google tsiah 有法度揣資料 ê Asus，伊 m̄ 捌出現這个問題，所以當食鹹 mā 掛鹹一个錢拍二十四个結 ê 翁冇手 kā 我換 Nokia 我猶是 m̄ 捌張持這个問題，一直到讀著這篇文章，我 tsiah 斟酌綴 leh 觀察新手機仔 ê 世界。

我已經 buē 記得彼篇文章按怎討論這个問題 mā 無興 uī 伊繼續跍踮 Google 撈魚，總是我非常確定這件代誌 tī Google 猶末通知我 ê 資料庫 ē 徙位進前，我 ê Nokia 捷捷出現華文文章，自收著通知遮 ê 華文文章 m̄ 捌閣出現，準做我猶是逐日固定踅臺灣電子報，Google m̄ 捌「臆我佮意」m̄-koh 有按 YouTube 遐連結推薦，像 ió-gà, Pilates 遮 ê 文章推薦，不過 mā m̄ 是齊是遮 ê 文章，推薦百百樣，這 m̄ 知佮我無 teh 使用社群媒體像 Meta 遮 ê 敢有相關？

 劉靜娟女仕 tī《落西北雨的下晡》 〈 無愛予伊知影我咧想啥〉寫著上網路搜揣烘碗機，紲落來踅到佗見到佗，其中寫著  Meta(面冊) hōo 我成做一隻貓，我較無行到佗齊是 ió-gà, Pilates 遮 ê 問題敢是我無 teh 使用 Meta 佮伊生湠出來 ê 社群有關係？

„Die Angst davor, dass das Leben unvollständig bliebe, ein Torso; das Bewusstsein nicht mehr der werden zu können, auf den hin man sich angelegt hatte. So hatten wir die Angst vor dem Tode schließlich gedeutet. Doch wie kann man sich, fragte ich, vor der fehlenden Ganzheit und Stimmigkeit des Lebens fürchten, wo man sie doch, wenn sie einmal zur unwiderruflichen Tatsache geworden ist, gar nicht mehr erlebt? … Unser Leben, das sind flüchtige Formationen aus Treibsand, von einem Windstoß gebildet, vom nächsten zerstört. Gebilde aus Vergeblichkeit, die verwehen, noch bevor sie sich richtig gebildet haben.“

--- Nachtug nach Lissabon

驚惶，生活停跤 tī 缺角，成做枝骨，意識著無法度閣創造想 bueh 成做 ê 人。

這成做咱 tuì 死亡驚惶最後 ê 解釋。

不過，呔 ē 按呢生，我問，無加圇 ê 整體佮 buē 敆榫 ê 驚惶人生，伊在那裏(ná-lí)，當伊成做一件無法度撤銷(thiat-siau) ê 事實，敢 m̄ 免閣體會？

菜色是 m̄ 甘伊 hōo 厝邊當做糞埽擲 tī 糞埽桶，就 kā 伊抾轉來收藏 ê FÜR DIABETIKER 專 uī 減肥所設計 ê 食譜冊。

這出菜出過三斗，總是菜色靈魂主角塗肉林檎色水從來 m̄ 捌交食譜相𫝛過，呔討按呢生？

敢是我 ê 塗肉林檎選 m̄ 著品種？

斟酌閣餾一斗食譜，我想我發見問題矣，人是厚油去炒，我是半煠半炒，按呢 ê 偷食步是 bueh 按怎 kā 伊炒甲金滑金滑，若健美選手 ê 膚色。

揣著答案，我總算 ē-tàng 放伊自由 mā 放我家己一條生路莫閣交伊纓纏 buē 離。

見若料理雞豆(Linsen/華:小扁豆)、雞心豆遮 ê hōo 德國大多數人嫌甲臭頭 ê 豆料理，我攏 ē 想著這句話 --- 歹食是歹食閣是米粉底。

𫝛款是豆，𫝛款有厚厚卵白質 ê 雞豆佮雞心豆相比並，色緻五彩 ê 雞豆猶是比 kan-ta 孤色 ê 雞心豆較有人緣，這个人緣好佮無人緣好 mā 捷 hōo 我成做 Le Penseur 愖起因，押尾我得著這个答案，m̄ 免費神愖別人 ê 問題。

確實 m̄ 免費神愖遮 ê 問題，遮 ê 問題就 tshan-tshiūnn 語言，有 ê 人 kan-ta 有法度接受伊認為好 ê 語言，有 ê 人是啥物攏想 bueh 學習，準做別人笑伊做寡無市草 ê 戇代誌，像「天真的人類學家小泥屋筆記」。

我愛食雞心豆 mā 愛食雞豆 m̄-koh 這兩个豆我猶有迒 buē 過 ê 坎。

雞豆，我愛食新沢無愛食罐頭，見 bueh 料理「德國電費足貴 ê 你敢知」隨換菜色，是講換菜色 mā 無法度省偌 tsuē 電錢，起因我無法度六分鐘出一桌像德國公共電視台分張 ê 智識，一个德國人煮一頓食，六分鐘，一个印度人煮一頓食至少點外鐘。

「關鍵評論網」tsuē-tsuē 篇討論手機仔中毒，德國、英國 tsuē-tsuē 節目討論「糖中毒」hōo 我想著這陣坐車 ê 光景，逐人 ê 頭猶原犁犁 m̄-koh 手頭捎 ê 物已經 m̄ 是手機仔孤項，特別是少年囡仔，tsuē-tsuē 少年囡仔開始綴 Heinrich Heine 感受 Von allen Welten, die der Mensch erschaffen hat, ist die der Bücher die Gewaltigste(Tī 人類創造 ê 世界，上強大 ê 是冊)。

我 m̄ 知影這个現象是受著 PISA ê 影響抑是...當 PISA 公告德國 ê 排名，真久無 tī 公共電台聽著新冊紹介 ê 我，又閣開始聽著新冊推薦，是講凡勢公廣電台有推薦，只是我聽 m̄ 著電台。

我愛踅德國冊局，不過我攏做 ' 獨立書店訪視員「只借書不買書」引議 文化部：即刻停止職務 ' 這款事工 buē 歹勢 ê kan-ta kā 踅無 bué 半本冊就離開。

德國 ê 冊是死豬仔價，一本拚過臺灣三本，不過我 m̄ 是 uī-tio̍h 這个原因無 bué 冊 mā 無認為冊圖書館借就好，我無 bué 冊是我猶未搪著 hōo 我想 bueh 讀 ê 冊，德國人愛讀小說，特別是犯罪推理這款，我愛讀長短篇散文像 Mit Hermann Hesse durch Italien: Ein Reisebegleiter durch Oberitalien 抑是 Ich bin dann mal weg, In 80 Tagen um die Welt 這類那小說 m̄-koh 是真實人生 ê 文學，所以我真罕得 tī 冊局紮一本冊轉來，另外我 mā 承認一本德文小說讀煞，我 ê 元気 mā 去一半。

雖罔元気 ē 去一半，不過我 tuì Dinner im Restaurant Heimweh - Anne Tyler ê 興趣 tshan-tshiūnn 一杯 Express 猶 teh 三心兩意，無法度殘殘豆干切五角。